18 de outubro de 2012

Primeira reunión do Liñas de fuga

O próximo mércores 24 de outubro terá lugar a primeira reunión do club de lectura na biblioteca do instituto. Será no segundo recreo. Non faltedes á cita. Mesmo se aínda non estades apuntados/as, ese será un bo momento para facelo.
Propóñense estes dous libros:
  • El fantasma de Canterville, de Oscar Wilde ( 1º e 2º de ESO)
  • Marta ante o espello, de Teresa Calo Fontán (3º e 4º de ESO)

Dez anos despois do Prestige

Fixeron falta dez anos para que por fin se celebre o xuizo para determinar as responsabilidades da marea negra que asolou en 2002 as costas galegas. Houbo moitos impedimentos, entre eles, o entramado de interes e países implicados, os cambios de xuíz, a tardanza en crear a fiscalía medioambiental...
Que se vai sacar deste xuízo? Saberemos quen foi o responsable das decisións tomadas? Quen autorizou a navegación dun barco nas súas condicións? Pero, sobre todo, interesa saber quen vai pagar os danos ocasionados. E xa é hora.
Verbas ao mar
Esta tarde están baixas as nubes
e é a cor do mar como a da cinza.

Os berros salvaxes das gaivotas
semellan coiteladas
que fan escoar o corazón da tarde.

Hai quen trabuca doadamente
a mensura do mar coa inmensidade.

Eu de min só sei dicir
que o mar comenza no meu sangue.
O que non sei
é se o mar caberá na miña alma.
                        
                                                        Manuel María


11 de outubro de 2012

Mo Yan, Premio Nobel de Literatura 2012

O escritor chino Guan Moye recibiu o Premio Nobel de Literatura 2012. Escribiu a sua primeira novela, Chuvia nunha noite de primavera,  empregando o pseudónimo de Mo Yan (Non Fales), polo que se lle coñece no seu país. Despóis desta viñeron as máis importantes , Sorgo roxo en 1987 e Grandes peitos ,amplas cadeiras, na que se repasa casi un século da historia de China vista desde os ollos dunha muller. A novela foi retirada, unha vez publicada, pola censura. A vida e a morte estanme desgastando é outra das súas obras; pica no título se queres saber máis dela.
Tamén podes ver unha pequena mostra da súa novela Sorgo roxo, levada ao cine.

Unha narración e un poemario


                                                                                                                                       La Voz de Galicia



Tonas de Laranxa , de María Lorenzo Miguéns e Manuel Lorenzo Baleirón

Ás tres da madrugada Uxío Oliveira ergueuse da cama sentindo no padal a acedume arcaica daquela colonia aflorada de lilas e cangorzas que ela tiña usado anos atrás para enfeitarse. Sabía con certeza que a defunta xa estaba alí, cos ollos da  mesma carriza gris das garzas somnámbulas que nesa hora percorrían os fochancos e tremedais lamacentos de Moreira. Vestida de loito de pés a cabeza, coma un animal noitébrego, unha sombra máis a carón das  demais sombras falmiliares da casa, Aurora dos Santos, reloxeira de sona que fora, acudía puntual á súa cita.
 Nas primeiras aparicións andaba a familia toda alporizada por ver que lle facer á avoa morta. Probáronse pregarias, xaculatorias e  invocacións diversas, calados esconxuros e mesmo veu o abade das Xunqueiras a botar un longo responso en intricado latín abenzoando a casa, salferindo cada recanto co aspersorio.

                                                                                                                As escollas selectivas.blogaliza
Atlas de Chaguán, de Rosa Enríquez
                                                                            da vida das cousas
as cousas: esas miniaturas cósmicas e vivas da
nosa civilizada decadencia. son obxectos e
parásitos vibrantes. aínda non sei ben se se alimentan
da estupidez ou a propician. a persoa e a cousa. a gran
cousa emocionante. l´effet de la chose.

eu mesma padecín este efecto. viví en la cosa y la amé


entón o etna abriu o seu forno incandescente
para min: puiden ver as guerras ocultas: os corpos
mutilados da infancia esquecida.

así son las cosas: no todas las niñas africanas mueren de
hambre y de calor. a maioría morren de medo.

4 de outubro de 2012

Novo curso no Macías

Nunca mellor puidemos comezar o novo curso: o noso compañeiro Manuel Lorenzo Baleirón, xunto coa súa filla María, ven de gañar o premio Xerais de Novela 2012, coa obra Tonas de laranxa . O libro xa está á venda e próximamente o autor presentarao nun acto organizado pola nosa biblioteca. Axiña teredes máis noticias do evento.
Tamén a nosa compañeira poeta Rosa Enríquez publica un novo poemario do que tamén vos daremos conta durante este curso.
Parabéns aos dous!
E continuamos co Plan de mellora de Bibliotecas, o que nos permite seguir a nosa andaina un novo ano, con actividades e novidades que nos farán máis doado o camiño que temos por diante.
O club de lectura Liñas de Fuga reúnese por primeira vez para organizar as sesións dos dous niveis: o dos que se incorporan este ano e o dos veteráns. A cita será o venres 5 no segundo recreo.