Reunión do cluble de lectura de 3º de ESO

As lectoras de 3º de ESO foron as primeiras en reunirse para poñeren en común as súas opinións sobre o libro escollido para este trimestre: RELATOS DO MUSEO, publicado polo Museo Provincial de Lugo. Trátase dun libro de  relatos de terror relacionados con algunha obra exposta no museo, e escritos por autores de sona entre as lectoras e lectores máis novos como Andrea Maceiras, Ledicia Costas, Carlos Negro... Foi moi interesante escoitar as súas opinións.

Recomendámosvos a lectura sen dúbida ningunha a todas e todos os que lles gusten os relatos de medo.  Ademais pode ser un xeito de desconectar un pouco un pouco de tantas panxoliñas, luces, grinaldas, doces... 

Moitas grazas a todas pola vosa participación.

 

25N 

Para conmemorar o Día contra a violencia machista , recibimos no  Macías  a escritora Montse Fajardo.

Montse charlou co alumnado de 1º de Bacharelato sobre o  seu libro INVISIBLES, no que nos presenta sete vítimas reais da violencia machista. 

A autora intenta visibilizar a violencia machista para así evitar que a sociedade mire cara a outro lado.

Unha boa lectura para desconectar de tanto exame. Animádevos a collelo na biblioteca!

 

 

 Na Bibliomacías adiantouse o Samaín, esa data na que o Alén se conecta co mundo dos vivos. Tres seres do Máis Alá  pasaron pola Biblioteca para explicar ao alumnado de 1º de ESO a orixe e o significado do Samaín; ademais de deixarnos unhas curtametraxes aterradoras( ou non tanto).

Seguro que quedaron impresionados coas terroríficas  cabazas que nos trouxeron os e as artistas de 1º e 2º de ESO.

Tamén nos deixaron recomendacións literarias para esta fin de semana de Samaín. Non deixedes de botarlles un ollo.

Grazas a todos e todas pola vosa participaciín. Que pasedes un Samaín de medo!

METES MEDO!

Velaquí temos de novo o Samaín! A Bibliomacias convoca un concurso de microrrelatos terroríficos para o alumnado de ESO.  Deixádevos arrastrar polas gadoupas do terror e participade!

Botádelle un ollo ás bases do concurso!

 

 

 

 

CONCURSO DE MICRORRELATOS  

“METES MEDO”

 

             B  A  S  E  S

 

1ª.- Concurso aberto a todos os niveis de ESO.

Establécense dous niveis:

·         1º e 2º de ESO

·         3º e 4º de ESO

2ª Presentaranse textos orixinais e non publicados anteriormente nin en medios analóxicos nin dixitais.

3ª A temática dos relatos será o terror.

4ª Características do texto:

a) Os textos presentaranse en galego cunha extensión mínima de 50 palabras e máxima de 100, sen contar o título e o texto inicial. Cada relato debe presentar un título e poden ir acompañados dunha ilustración, dun debuxo ou viñeta complementarias. Os relatos teñen que ser continuación do texto que aparece ao final destas bases.

b) Pódese presentar máis dun relato.

c) Os textos deben escribirse nun folio á man, ordenador ou máquina de escribir. No reverso do folio indicarase o nome e apelidos da/do participante. Tamén se pode enviar  en formato PDF a través da Aula Virtual da Biblioteca, indicando os datos do/da autor/-a na cabeceira do documento.

d) Para os textos enviados en PDF ou feitos a ordenador, utilizarase a letra “Calibrí” tamaño 12.

5ª Os textos entregaranse ao profesorado de Lingua Galega na clase (Isabel Mouriño, Xesus López, Matilde Pardiñas) ou ao encargado da Biblioteca (Miguel Ángel Prieto) nas horas de recreo na Biblioteca.

6ª A data límite de entrega será o día 29 de outubro de 2021 (en papel) e ata o día 2 de novembro pola Aula Virtual da Biblioteca.

7ª A escolla do relato gañador farase atendendo á imaxinación e estilo do autor/-a e á corrección formal do texto.

8ª O Xurado está composto polo profesorado encargado do Equipo da Biblioteca.

9ª O relato gañador publicarase no blog da Biblioteca do IES Macías o Namorado e no panel informativo do Centro.

10ª PREMIOS.

Relato ganador nos niveis de 1º e 2º de ESO: Un vale de 10 euros para a Cafetaría do centro e un libro de relatos de terror.

                                              

Relato ganador nos niveis  de 3º e 4º de ESO): Un vale de 10 euros para a Cafetaría do centro e un libro de relatos de terror.

               

               

 

 

 

 

 

“Algo pasa na biblioteca do Macías na semana de Defuntos. Todas as mañás aparecen os libros do mesmo andel estrados polo chan, e unhas misteriosas pegadas que rematan na Dirección... “

 

 

 

 

Desde a Biblioteca dámosvos a benvida a todos e todas  ao curso 2021-2022, especialmente ao alumnado que se incorpora este ano ao noso Centro, ao que convidamos a vir coñecer a Biblioteca  e botar unha olladiña, Havos gustar!

 

 

A biblioteca estará aberta todos as días en horario lectivo. Lembrade que cómpre respectar as normas COVID e que o número máximo de persoas permitido é de 42.

 

Se quixerdes coller ou devolver un libro, unha película etc. , podedes facelo nos recreos falando co profesor ou profesora responsable.  Este é o noso horario :

LUNS: 1º recreo ( Xesus)

MARTES : 1º recreo ( Xesus)

MÉRCORES: : 1º recreo (Isabel), 2º recreo ( Xesus)

XOVES: : 1º recreo (Miguel Ángel)

VENRES : : 1º recreo (Isabel),   2º recreo ( Xesus) 

 

Tamén podedes solicitar o empréstito a través da mensaxería da aula virtual da biblioteca. Alí atoparedes as instrucións de como facer as reservas.

Gustaríanos que atoparades na nosa biblioteca todo o que precisedes; se vos interesa un libro, película etc,  que non teñamos, podedes pedírnolo mandando unha mensaxe pola aula virtual. Lembrade poñer o voso nome e curso ademais do título, autor e editorial ( se a sabedes) da obra que  queredes que merquemos. Tamén podedes deixar a vosa petición  na caixa de suxestións que tedes na entrada da biblioteca.

Toda a comunidade educativa forma parte da biblioteca, sen vós non ten sentido a súa existencia. Animádevos a participar nas actividades. Agardamos a vosa visita e a vosa colaboración.

Bo curso e felices lecturas a todos e todas.